Hóbennan a siña e bailenan klásiko di ántes, grandinan a balia den estilo di awendia. Hóben i grandi a topa otro pa medio di baile den e bunita proyekto di School of Performing Arts Bonaire (SPAB, ántes konosí komo Dance Sensation Foundation).
Angele Cecilia, dirigente di SPAB:
‘Hende grandi ta forma un grupo di enfoke pa kua nos tin hopi rèspèt. Nan tin asina tantu konosementu, eksperensia, idea i kreatividat. Pa nos tabata un honor pa por a traha ku nan. Di otro banda tabata e hóbennan ku ta konosí ku e último inovashonnan riba tereno di baile, ku e último ‘moves’ di urban i hiphop. E enkuentro entre e dos gruponan akí tabata tremendo. E brio den wowo di hóbennan í grandinan a bisa hopi.
Esaki tabata e promé inisiativa di Servisio na Komunidat Boneiru / Maatschappelijke Diensttijd Bonaire (MDT), un proyekto nobo na Boneiru, spesialmente pa hóben. Na MDT Boneiru hóbennan ta hasi algu pa komunidat, ku meta desaroyá nan talento i siña konosé nan mes.
